དེང་གི་དུས་སུ་ང་ཚོ་མང་ཆེ་བས་ཉིན་རེའི་འཚོ་བའི་ནང་གློག་ཀླད་ལས་ལྷག་པའི་ཁ་པར་བེད་སྤྱོད་བྱེད་ཀྱི་ཡོད། ས་གནས་གང་སུ་སོང་ཡང་ལུས་དང་གྲིབ་མ་བཞིན་འཁུར་ནས་ཡོད། ལས་དོན་མ་པོ་ཞིག་ཀྱང་ཁ་པར་ནས་སྒྲུབ་ཐུབ་པ་ཆགས་འགྲོ་གི་ཡོད། ཁ་ོཔར་སྒང་ཡི་གེ་ཐུང་ཐུང་འབྲི་རྒྱུ་ཞིག་སྟབས་བདེ་པོ་ཞིག་ཡིན་ཡང་། རྩོམ་ཡིག་རིང་པོ་འབྲི་བ་དང་། ཡིག་ཆ་སྒྲིག་སྦྱོར་བྱེད་པའི་སྐབས་སུ་ཁ་པར་གྱི་ཤེལ་ངོས་སྟེང་གི་མཐེབ་གཞོང་ (Touch Keyboard) དེས་བདེ་མྱུར་ཞིག་ཡོང་མི་ཐུབ་པའི་དཀའ་ངལ་ཡོད། དེར་བརྟེན་དེ་རིང་ང་ཚོས་ Keyman Keyboard ཞེས་པའི་མཉེན་ཆས་འདི་བརྒྱུད་ནས། ཕྱི་ལོག་གི་མཐེབ་གཞོང་དངོས་སུ་ཁ་པར་ལ་མཐུད་དེ་གློག་ཀླད་ནང་བཞིན་བོད་ཡིག་ཇི་ལྟར་གཏག་དགོས་མིན་སྐོར་ངོ་སྤྲོད་ཞུ་རྒྱུ་ཡིན།
Keyman Keyboard ཟེར་བ་གང་རེད་དམ།
Keyman ནི་སྐད་ཡིག་སྣ་མང་བཀོལ་སྤྱོད་ཐུབ་པའི་རིན་མེད་དང་ཁུངས་གྲོལ་ (Free and Open Source) གྱི་མཐེབ་གཞོང་མཉེན་ཆས་ཤིག་རེད། འདིའི་ཁྱད་ཆོས་གཙོ་བོ་ནི་ Windows, Mac, iOS, Android སོགས་མ་ལག་ཚང་མའི་ནང་བེད་སྤྱོད་གཏོང་ཐུབ་པ་མ་ཟད། བོད་ཡིག་གི་མཐེབ་གཞོང་སྒྲིག་གཞི་ (Layout) འདྲ་མིན་སྣ་ཚོགས་ (དཔེར་ན་wylieདང་། Dzongkha, Himalaya ལྟ་བུ) རང་འདོད་ལྟར་ཕབ་ལེན་བྱས་ནས་བཀོལ་སྤྱོད་ཆོག་པ་དེ་རེད།
ཕྱི་ལོག་གི་མཐེབ་གཞོང་ (Physical Keyboard) ཁ་པར་ལ་མཐུད་པའི་དགེ་མཚན།
དེ་རིང་གི་གནད་དོན་གཙོ་བོ་ནི་ Keyman བེད་སྤྱད་དེ་ཕྱི་ལོག་གི་མཐེབ་གཞོང་དང་ཁ་པར་མཐུད་རྒྱུ་དེ་རེད། འདི་ལྟར་བྱས་ན་ཁེ་ཕན་ཆེན་པོ་ཡོད།
- མགྱོགས་ཚད་དང་དག་ཆ། ཁ་པར་གྱི་ཤེལ་ངོས་སུ་མཛུབ་མོས་རེ་རེ་བཞིན་གཏག་པ་ལས། ལག་པ་གཉིས་ཀས་མཐེབ་གཞོང་དངོས་ཀྱི་སྟེང་དུ་གཏག་ན་ཡིག་འབྲུའི་མགྱོགས་ཚད་ལྡབ་འགྱུར་གྱིས་མྱུར་བ་ཡོད།
- མིག་ལ་གནོད་པ་ཆུང་བ། ཁ་པར་གྱི་མཐེབ་གཞོང་གིས་ཤེལ་ངོས་ཀྱི་ཕྱེད་ཀ་ཙམ་བཀབ་འགྲོ་ཡི་ཡོད་པས། རྩོམ་ཡིག་ཀློག་ཞོར་དུ་འབྲི་བར་བར་ཆད་ཆེན་པོ་བཟོ་གི་ཡོད། ཕྱི་ལོག་གི་མཐེབ་གཞོང་མཐུད་སྐབས་ཁ་པར་གྱི་ཤེལ་ངོས་ཆ་ཚང་ཡིག་ཆ་ལྟ་ཀློག་ཆེད་སྤྱོད་ཐུབ།
- གློག་ཀླད་ཀྱི་ཉམས་མྱོང་། ཁྱེད་རང་འགྲུལ་བཞུད་བྱེད་སྐབས་གློག་ཀླད་འཁྱེར་མི་དགོས་པར། ཁ་པར་དང་མཐེབ་གཞོང་ཆུང་ཆུང་ཞིག་ཡོད་ན་ལས་ཀ་གང་ཡང་སྒྲུབ་ཐུབ།
ཨན་ཌོ་ (Android) ཁ་པར་ནང་ Tibetan Direct Input སྒྲིག་འགུག་བྱེད་སྟངས།
ཁྱེད་ཀྱིས་ཨན་ཌོ་ཁ་པར་ནང་ Keyman བེད་སྤྱོད་བྱས་ཏེ་བོད་ཡིག་གཏག་པར་གཤམ་གྱི་རིམ་པ་རྣམས་རེ་རེ་བཞིན་ལག་བསྟར་གནང་རོགས།
རིམ་པ་དང་པོ། Keyman མཉེན་ཆས་ཕབ་ལེན། Google Play Store ནང་དུ་ཕེབས་ནས་ “Keyman” ཞེས་བཙལ་ཏེ་མཉེན་ཆས་དེ་ཁ་པར་ནང་ཕབ་ལེན་དང་སྒྲིག་འཇུག་ (Install) བྱོས།
རིམ་པ་གཉིས་པ། བོད་ཡིག་མཐེབ་གཞོང་འཚོལ་བ། Keyman མཉེན་ཆས་ཀྱི་ཁ་ཕྱེ་སྟེ་སྒྲིག་གཞི་ (Settings) ནང་འཛུལ་དགོས།
- Settings -> Installed Languages ཞེས་པའི་ནང་འཛུལ་དགོས།
- དེའི་རྗེས་ Add a Language ཞེས་པའི་སྟེང་མནན་ཏེ། འཚོལ་སྒྲོམ་ནང་ “Tibetan” ཞེས་འཚོལ་དགོས།
- འདིའི་ནང་ནས་ཁྱེད་ཀྱིས་ Tibetan Direct Input ཡང་ན་ Tibetan Standard (Microsoft Himalaya) གང་རུང་ཞིག་འདེམས་རོགས། (དམིགས་བསལ་ Tibetan Direct Input འདི་གློག་ཀླད་ཀྱི་མཐེབ་གཞོང་དང་ཧ་ཅང་མཐུན་པོ་ཡོད།)
རིམ་པ་གསུམ་པ། མཐེབ་གཞོང་ཁ་པར་གྱི་མ་ལག་དང་མཐུད་པ། མཉེན་ཆས་ནང་གི་མཐེབ་གཞོང་ཕབ་ལེན་ཟིན་རྗེས། ཁ་པར་གྱི་ System Settings ནང་འཛུལ་ནས་ Keyman དེ་ཁ་པར་གྱི་མཐེབ་གཞོང་གཙོ་བོར་བསྒྱུར་དགོས། (འདི་ Keyman མཉེན་ཆས་སྒོ་ཕྱེ་དུས་རང་བཞིན་གྱིས་ལམ་སྟོན་བྱེད་ངེས་རེད།)
རིམ་པ་བཞི་པ། ཕྱི་ལོག་གི་མཐེབ་གཞོང་མཐུད་སྟངས། (གལ་ཆེ་ཤོས) ད་ལྟ་ཁྱེད་ལ་ OTG (On-The-Go) མཐུད་ཐག་ཅིག་དགོས།
- OTG མཐུད་ཐག འདི་ནི་ཁ་པར་གྱི་གློག་རྒྱག་ས་ (Type-C or Micro-USB) དེ་ USB ཨ་མར་བསྒྱུར་བྱེད་ཀྱི་མཐུད་ཐག་ཅིག་རེད།
- ཕྱི་ལོག་གི་མཐེབ་གཞོང་ (USB Keyboard) དེ་ OTG བརྒྱུད་ནས་ཁ་པར་ལ་སྦྲེལ་དགོས། (གལ་ཏེ་ Bluetooth Keyboard ཡིན་ན་ཐད་ཀར་ Bluetooth བརྒྱུད་ནས་མཐུད་ཆོག)
- མཐུད་ཚར་བ་དང་ Keyman གྱིས་རང་བཞིན་གྱིས་ཕྱི་ལོག་གི་མཐེབ་གཞོང་ངོས་འཛིན་བྱེད་ཐུབ།
རིམ་པ་ལྔ་པ། མཐེབ་གཞོང་བེད་སྤྱོད་གཏོང་བ། ད་ནི་ཁྱེད་ཀྱིས་ WhatsApp པམ་ Note གང་རུང་གི་ནང་དུ་འཛུལ་ནས། གློག་ཀླད་སྟེང་དུ་བོད་ཡིག་གཏག་པ་ནང་བཞིན་ཐད་ཀར་མགྱོགས་པོ་གཏག་ཐུབ། Keyman གྱི་ཁྱད་ཆོས་བཟང་པོ་ཞིག་ནི། ཁྱེད་ཀྱིས་མགོ་ཅན་དང་འདོགས་ཅན་ (Stacking) རྣམས་Shift གནན་ནས་གཏག་ཐུབ། མཐེབ་གཞོང་གི་རེའུ་མིག་ནི་གཤམ་གསལ་ལྟར་ཡིན།
བོད་ཡིག་གཏག་སྟངས་སྐོར་གྱི་གནས་ཚུལ་རྒྱས་པ་ཤེས་འདོད་ན། དྲྭ་གནས་འདི་ནས་གཟིགས། https://help.keyman.com/keyboard/tibetan_unicode_direct_input/1.1/tibetan_unicode_direct_input
མཇུག་བསྡུའི་གཏམ།
Keyman Keyboard དང་ཕྱི་ལོག་གི་མཐེབ་གཞོང་ཟུང་འབྲེལ་བྱེད་པ་ནི། བོད་ཡིག་གི་རྩོམ་པ་པོ་དང་། ལས་བྱེད། སློབ་ཕྲུག་སུ་ཞིག་ཡིན་རུང་། དུས་ཚོད་གྲོན་ཆུང་དང་ལས་ཀའི་སྤུས་ཚད་གོང་མཐོར་གཏོང་བའི་ཐབས་ལམ་མཆོག་ཏུ་གྱུར་པ་ཞིག་རེད། ལག་རྩལ་འདི་བེད་སྤྱོད་བྱས་ནས་ང་ཚོའི་སྐད་ཡིག་འདི་ཌི་ཇི་ཊལ་(digital)གྱི་འཇིག་རྟེན་ནང་དཀའ་ཚེགས་མེད་པར་བཀོལ་སྤྱོད་ཐུབ་པར་སྨོན།
