གལ་ཏེ་ཁྱེད་ཀྱིས་དོ་སྣང་བྱུང་ཡོད་ན། དེང་སང་གློག་ཀླད་དང་གློག་ཆས་མང་ཆེ་བའི་སྟེང་དུ་ USB མཐུད་ཁ་ (USB Port) ལ་ཁ་དོག་མི་འདྲ་བ་དུ་མ་ཡོད་པ་མཐོང་ཐུབ། འོན་ཀྱང་། ཁྱེད་ཀྱིས་མཐུད་ཁ་དེ་དག་གི་ཁ་དོག་མི་འདྲ་བ་ནི་མཛེས་ཆོས་ཙམ་མ་ཡིན་པར་སྣང་བ་མ་གཏོགས། དེ་དག་གི་ནུས་པ་དང་མྱུར་ཚད་མཚོན་བྱེད་ཡིན་པ་ཤེས་སམ། འདིར་ང་ཚོས་ USB མཐུད་ཁའི་ཁ་དོག་གིས་ཅི་ཞིག་མཚོན་གྱི་ཡོད་པའི་སྐོར་ལ་བལྟ་བར་བྱ། གཅིག་བྱས་ན་མ་འོངས་མཐེབ་སྡེར་(pendrive)སོགས་ཉོ་སྐབས་ཁྱད་པར་འགྲོ་སྲིད།
༡. ཁ་དོག་དཀར་པོ། (USB 1.0/1.1)
འདི་ནི་ USB ལག་རྩལ་གྱི་ཐོན་ཐོག་མའི་མཚོན་རྟགས་ཡིན། འདིའི་གཞི་གྲངས་(data)དང་ཡིག་ཆ་བརྒྱུད་གཏོང་གི་མྱུར་ཚད་ཧ་ཅང་དལ་བས། དེང་སང་གི་གློག་ཀླད་གསར་པ་རྣམས་ཀྱི་སྟེང་དུ་ཧ་ལམ་མཐོང་རྒྱུ་དཀོན། འདི་ནི་གཙོ་བོ་ལོ་རབས་དགུ་བཅུ་པའི་ནང་གི་གློག་ཆས་རྙིང་པ་དག་གི་སྟེང་དུ་ཡོད།
༢. ཁ་དོག་ནག་པོ། (USB 2.0)
ཁ་དོག་ནག་པོའི་མཐུད་ཁ་ནི་ USB 2.0 ཡིན་ཞིང་། འདི་ནི་དུས་ཡུན་རིང་པོར་ཚད་གཞི་གཙོ་བོ་ཞིག་ཏུ་གྱུར་ཡོད། འདིའི་མྱུར་ཚད་མཐོ་ཤོས་ནི་ 480 Mbps ཡིན་པ་དང་། གཙོ་བོ་ཙི་གུ་ (Mouse) དང་མཐེབ་གཞོང་ (Keyboard) སོགས་མྱུར་ཚད་ཆེན་པོ་མི་དགོས་པའི་གློག་ཆས་སྦྲེལ་བྱེད་དུ་བཀོལ་གྱི་ཡོད། USB 2.0 ད་ལྟའི་དུས་སུའང་མཐོང་རྒྱུ་ཡོད་ལ། མཐེབ་སྡེར་ pendrive རིན་གོང་ཁེ་པོ་ཡོད་འོན་ཀྱང་གློག་ཀླད་ནས་ཡིག་ཆ་ཕར་བཤུ་ཚུར་བཤུས་བྱ་དགོས་ན་ཧ་ཅང་འགོར་པོ་ཡོད། དཔེར་ན་ཡིག་ཆ་ 10GB ཞིག་བཤུ་རྒྱུར་ཉུང་ཐར་སྐར་མ་18 ཙམ་འགོར་སྲིད།
༣. ཁ་དོག་སྔོན་པོ། (USB 3.0 / USB 3.1 Gen 1)
གལ་ཏེ་ཁྱེད་ཀྱི་གློག་ཀླད་སྟེང་སྔོན་པོའི་མཐུད་ཁ་ཡོད་ན། དེ་ནི་ “SuperSpeed” ཞེས་པའི་མྱུར་ཚད་མཐོ་བའི་མཐུད་ཁ་ཡིན། འདིའི་མྱུར་ཚད་ནི་ USB 2.0 ལས་ལྡབ་བཅུ་ཙམ་གྱིས་མགྱོགས་པ་ (5 Gbps) ཡོད་པས། ཡིག་ཆ་ཆེན་པོ་རྣམས་བཤུས་འབྲི་བྱེད་པར་ཧ་ཅང་འཚམ་པོ་ཡོད། དཔེན་ན་གོང་གི་དཔེ་མཚོན་དེ་རང་བཞག་ན། ཡིག་ཆ་ 10GB ཞིག་བཤུ་རྒྱུར་ཉུང་ཐར་སྐར་མ་ 3 ཙམ་འགོར་སྲིད།
༤. ཁ་དོག་སྔོ་ལྗང་ངམ་སྔོ་སྐྱ། (USB 3.1 Gen 2)
འདི་ནི་སྔོན་པོ་ལས་ཀྱང་མྱུར་ཚད་མགྱོགས་པའི་མཐུད་ཁ་ཞིག་ཡིན། འདིའི་མྱུར་ཚད་ནི་ 10 Gbps ཟིན་གྱི་ཡོད་པས། དེང་སང་གི་གློག་ཀླད་གསར་པ་མང་པོའི་སྟེང་དུ་མཐོང་ཐུབ། གློ་བུར་དུ་ལྟ་ན་ཁ་དོག་སྔོན་པོ་དང་ནོར་གཞི་ཡོད།
༥. ཁ་དོག་དམར་པོའམ་སེར་པོ། (Always-on / Charging Port)
ཁ་དོག་དམར་པོ་དང་སེར་པོའི་མཐུད་ཁ་ནི་གཙོ་བོ་ “གློག་གསོག་བྱེད་” ཀྱི་མཐུད་ཁ་ཡིན། མཐེབ་སྡེར་སོགས་ལ་མེད། འདིའི་ཁྱད་ཆོས་གཙོ་བོ་ནི། ཁྱེད་ཀྱི་གློག་ཀླད་བསད་ཡོད་ནའང་ (Sleep mode or Off)། མཐུད་ཁ་འདི་བརྒྱུད་ནས་ཁ་པར་དང་གློག་ཆས་གཞན་ལ་གློག་མཁོ་སྤྲོད་བྱས་ཐུབ་པ་དེ་ཡིན། དེ་བཞིན་འདི་ནི་ USB 3.1/3.2 ཡི་མྱུར་ཚད་མཐོ་བའི་མཐུད་ཁ་ཡང་ཡིན་སྲིད།
༦. ཁ་དོག་ལྗང་ཁུ། (Quick Charge)
ཁ་དོག་ལྗང་ཁུ་ནི་མང་པོ་མཐོང་རྒྱུ་མེད་ནའང་། འདི་ནི་གཙོ་བོ་གློག་གསོག་མྱུར་པོ་བྱེད་པའི་ (Quick Charge) ནུས་པ་ཡོད་པའི་མཐུད་ཁ་དག་ལ་བཀོལ་གྱི་ཡོད།
མཇུག་བསྡུའི་ལམ་སྟོན།
ཁ་དོག་འདི་དག་ནི་བཟོ་གྲྭ་མང་ཆེ་བས་བེད་སྤྱོད་གཏོང་བའི་ཚད་གཞི་ཞིག་ཡིན་ནའང་། སྐབས་རེར་བཟོ་གྲྭ་ཁ་ཤས་ (དཔེར་ན་ Apple ལྟ་བུ) ཀྱིས་ཁ་དོག་འདི་དག་མི་བཀོལ་བར། འཇུག་སྒོའི་འགྲམ་དུ་ཡོད་པའི་རྟགས་ (Icon) ལ་བལྟས་ནས་དབྱེ་བ་འབྱེད་དགོས།
- SS (SuperSpeed): མྱུར་ཚད་མཐོ་བའི་ USB 3.0 མཚོན།
- གློག་ཞགས་ཀྱི་རྟགས།: གློག་ཀླད་བསད་ཡོད་ནའང་གློག་གསོག་ཐུབ་པ་མཚོན།
ཐེངས་རྗེས་མར་ཁྱེད་ཀྱིས་ USB བཀོལ་དུས། ཁ་དོག་ལ་བལྟས་ནས་འོས་འཚམ་གྱི་མཐུད་ཁ་བདམས་ན། དུས་ཚོད་གྲོན་ཆུང་དང་ལས་ཀའི་ནུས་པ་ཆེ་རུ་གཏོང་ཐུབ་པ་ཡིན།
ད་ལྟའི་ཆ་ USB 2.0 and USB 3.1 Gen 1 གི་རིན་གོང་ཁྱད་པར་ཆེན་པོ་དེ་ཙམ་མེད་པ་ཆགས་ཡོད། དེར་བརྟེན་མྱུར་ཚད་ཆེ་བ་དེ་ཉོས་ན་ལེགས་པོ་ཡོད་རེད། གཤོང་ཚད་32GB བྱས་པའི་ USB 3.1 Gen 2 (10Gbps) pendrives རིགས་བཟོ་སྐྲུན་བྱས་ཀྱི་མེད། ཕྱི་གསོག་ external SSDs དང་མཐེབ་སྡེར་གཤོང་ཚད་ 128GB རིགས་ལ་USB 3.1 Gen 2རགས་ཐུབ།
