AI བེད་སྤྱོད་འདི་འདྲ་གཏོང་རྒྱུ་ཡོད།

རིག་ནུས་ AI བེད་སྤྱོད་འདི་འདྲ་བྱ་རྒྱུ་ཡོད།: བཅོས་མའི་རིག་ནུས་བརྒྱུད་ནས་དཔེ་དེབ་ཀྱི་འདྲ་གཟུགས་སྣ་ཚོགས་བསྐྲུན་པའི་ཉམས་མྱོང་།

ཉེ་ཆར་ངས་ Google Gemini བཅོས་མའི་རིག་ནུས་ (Artificial Intelligence=བཅོས་མའི་རིག་ནུས། མདོར་བསྡུས་ན་རིག་ནུས་ AI) སྟེང་རི་མོའི་ཇུས་འགོད་སོགས་ལ་ཚོད་ལྟ་ཞིག་བྱས་པའི་ཉམས་མྱོང་དང་དེའི་ནུས་པ་ཁྱད་པར་ཅན་རྣམས་ངོ་སྤྲོད་ཞུ་འདོད་བྱུང་། བཅོས་མའི་རིག་ནུས་ནི་ཡི་གེའི་ལམ་ནས་བེད་སྤྱོད་ཙམ་མ་ཡིན་པར། དཔར་དང་འགུལ་རིས། སྒྲ་དང་བརྙན་སོགས་ཅི་རིགས་ལ་བེད་སྤྱོད་གཏོང་ཐུབ་པ་ཆགས་ཡོད། འདིར་ད་རེས་གུས་པས་གློག་ཀླད་དང་ཁ་པར་བེད་སྤྱོད་གཏོང་མཁན་ཚོས་སྟབས་བདེ་པོའི་ངང་དཔེ་དེབ་སོགས་ཀྱི་རྒྱབ་ཤའི་རི་མོ་ཞིག་ཁྱབ་བསྒྲགས་ལ་མཁོ་བའི་དཔེ་དེབ་ཀྱི་འདྲ་རིགས་སྙིང་རྗེ་པོ་དེ་འདྲ་བཟོ་སྟངས་བརྙན་དང་རྩོམ་ཡིག་ཐོག་ནས་ངོ་སྤྲོད་བྱེད་འདོད་བྱུང་།

📝 རི་མོ་གཅིག་ལས་འདྲ་གཟུགས་སྣ་ཚོགས།

ངས་དཔེ་དེབ་ཅིག་གི་ཕྱི་ཤོག་ཆ་ཚང་ (མདུན་རྒྱབ་དང་སྒལ་པ། ) ཡོད་པའི་ཡིག་ཆ་ཞིག་ Gemini ལ་བཏང་སྟེ། དེ་ཉིད་བེད་སྤྱད་ནས་འདྲ་གཟུགས་ (mockup) སྣ་ཚོགས་བསྐྲུན་ཐབས་བྱས། ཉམས་མྱོང་དེ་ཧ་ཅང་ཡིད་དུ་འོང་བ་ཞིག་བྱུང་སོང་། འདི་ལྟར་བསྐྲུན་པའི་དཔེ་དེབ་ཀྱི་ཁྱབ་བསྒྲགས་འདྲ་གཟུགས་རྣམས་མིག་ལམ་དུ་མཛེས་ཤིང་དངོས་ཡོད་དང་མཚུངས་པའི་སྣང་བ་སྟེར་བྱུང་། དང་ཐོག་ངས་དེབ་ཀྱི་རྒྱབ་ཤ་གཤམ་འོག་ཏེ་སྦྱར་ནས་སྐུལ་ཚིག་(prompt)བཏང་འགོ་བཙུགས་པ་ཡིན། དབྱིན་ཡིག་ཐོག་ prompt དང་རྒྱ་ཡིག་ནང་ 提示词 ཟེར་གྱི་འདུག་པས་བོད་ཡིག་ནང་’སྐུལ་ཚིག་‘ཟེར་ན་འོས་འཚམས་འདུག་དྲན། རི་མོ་གང་ཞིག་ལ་སྐུལ་ཚིག་གང་ཞིག་གཏག་ཡོད་པ་བོད་དབྱིན་གཉིས་ཀའི་ཐོག་འོག་གི་རྩོམ་ཡིག་ནང་བཀོད་ཡོད་པས་དེ་དག་ལ་དཔེ་ལེན་ནས། རང་སོ་སོས་ཚོད་ལྟ་དང་ལད་མོ་རེ་བྱས་ན་འགྲིག

དཔར་འདི་ནི། གུས་པས་ཉེ་ཆར་ཇུས་འགོད་བྱས་པའི་དཔེ་དེབ་ཀྱི་རྒྱབ་ཤ་ཞིག་རེད།

༡. དཔེ་ཚོང་ཁང་གི་འདྲ་གཟུགས། (The Bookstore Mockup)

ཐོག་མར་ངས་རིག་ནུས་ AI ལ་དཔེ་དེབ་ཀྱི་ཕྱི་ཤོག་དེ་བེད་སྤྱད་ནས། “དཔེ་ཚོང་ཁང་དུ་ཉོ་རྒྱུ་ཡོད་པའི་དཔེ་དེབ་དངོས་ཀྱི་འདྲ་གཟུགས་ཤིག་བསྐྲུན་”དགོས་པའི་སྐུལ་ཚིག་སྤྲད། འདིས་དཔེ་དེབ་ཀྱི་སྤུས་ཚད་དང་དཔེ་དེབ་ངོ་བ་ཞིག་ད་ལྟ་དཔར་སྐྲུན་བྱས་ཟིན་པའི་སྣང་བ་ཞིག་བྱིན་སོང་།

IMAGE PROMPT: Create a book mockup base on this attached cover (which is a spread image having front cover, spine and backcover). The book mockup must present as if the actual book now available in bookstore to buy.

༢. སྤྱི་གླིང་ནང་ཀློག་བཞིན་པའི་བུད་མེད་མཛེས་མ། (Girl Reading in a Park)

དེ་ནས་ངས་དཔེ་དེབ་དེ་སྤྱི་ཚོགས་ནང་ཇི་ལྟར་བེད་སྤྱོད་བྱེད་བཞིན་པའི་རྣམ་པ་སྟོན་ཆེད། བཅོས་མའི་རིག་ནུས་ལ་”ཕྱུ་པ་གྱོན་པའི་བོད་མོ་གཞོན་ནུ་མཛེས་མ་ཞིག་སྤྱི་གླིང་ནང་དཔེ་དེབ་འདི་ཀློག་བཞིན་པའི་འདྲ་རིས་ཤིག་བསྐྲུན་”དགོས་པའི་བཀོད་པ་བྱས། སྐར་ཆ་ཁ་ཤས་ནང་གཤམ་གྱི་རི་མོ་དེ་བཟོས་སོང་། ཕྱུ་པ་དང་པང་གདན་དེ་ཏོག་ཙམ་ཁྱད་མཚར་བཟོས་པ་མ་གཏོགས། དེ་མིན་ཧ་ཅང་ཡག་པོ་བཟོས་འདུག །དཔར་དེ་ཐེངས་པ་གཅིག་ལ་དེ་འདྲ་སླེབས་སོང་། གལ་ཏེ་མུ་མཐུད་ཚོད་ལྟ་ཐེངས་ཁ་ཤས་ཞིག་བྱས་ཐུབ་ན་གྲུབ་འབྲས་དེ་ལས་ལེགས་པོ་ཡོང་ངེས་རེད།

*IMAGE PROMPT: Create another setting where a beautiful young Tibetan girl in Tibetan Chup dress reading this book in a park.*

༣. བརྩེགས་ནས་བཞག་པ་ལྟར་གྱི་དཔེ་དེབ། (Stacked Books)

“དཔེ་དེབ་ཚོང་འགྲེམས་དང་ཁྱབ་བསྒྲགས་ཀྱི་ཆེད་དུ་དཔེ་དེབ་འགའ་ཤས་ཅོག་ཙེ་སྟེང་བརྩེགས་ཡོད་པ་དང་། དཔེ་དེབ་གཅིག་ངར་བསྒྲངས་ཏེ་མདུན་ཤོག་གསལ་པོ་སྟོན་པ་ཞིག སྒྲོམ་གཞི་ 16:10 ཡིན་པའི་འདྲ་རིས་ཤིག་བསྐྲུན་དགོས་”པའི་སྐུལ་ཚིག་སྤྲད་ནས་གཤམ་གྱི་རི་མོ་འདི་ཤར་སོང་།

*IMAGE PROMPT: Also create another image, where stacked copy of this books are placed on a table. Make one book standing and showing the front cover. Make the image in ratio of 16:10*

༤. ཇ་ཁང་ནང་གི་དཔེ་དེབ། (Book in a Coffee Shop)

དེ་བཞིན་ཉིན་རེའི་འཚོ་བའི་ཁྲོད་དཔེ་དེབ་ཀློག་བཞིན་པའི་ཚོར་སྣང་ཞིག་སྤྲོད་ཆེད། ཇ་ཁང་ཞིག་གི་ཅོག་ཙེ་སྟེང་དུ་དཔེ་དེབ་དེ་བཞག་ཡོད་པ་དང་། དཔེ་དེབ་གི་བར་དུ་དཔེ་རྟགས་མཛེས་པོ་ཞིག་བཅུག་ཡོད་པའི་ འདྲ་རིས་ཤིག་བསྐྲུན་དགོས་པའི་མངགས་བྱ་བྱས། འདིས་དཔེ་དེབ་ཀྱི་རྣམ་པ་བདེ་མོ་དང་འཇམ་ཞིང་ཉམས་དགའ་བ་ཞིག་བསྟན་ཡོད།

IMAGE PROMPT: lso create another image, where the book is laying on the table in the coffee shop. The book is closed but a beautiful bookmark can be seen inserted in between the book. Make the image in ratio of 16:10

༥. བོད་མོ་ཞིག་གིས་དཔེ་དེབ་བཟུང་བ། (Tibetan Woman Holding the Book)

མཇུག་མཐར་ངས་བོད་མོ་ཞིག་གི་འདྲ་པར་ (tibetan woman.jpg) བཅུག་སྟེ། བོད་མོ་དེས་དཔེ་དེབ་འདི་ལག་པ་གཉིས་ཀྱིས་འཛིན་པའི་འདྲ་རིས་ཤིག་བསྐྲུན་དགོས་པའི་སྐུལ་ཚིག་སྤྲས། ལྷག་པར་དུ་གཏན་ཆའི་ཆེད་ལག་པ་གསུམ་པ་མི་ཡོང་བ་དང་། ངོ་གདོང་གི་རྣམ་པ་མི་འཁྱོག་པ། མཛུབ་མོ་དྲུག་པ་མི་ཡོང་བ། ལག་པ་དཔེ་དེབ་བརྒྱུད་ནས་མི་ཐོན་པ་སོགས་ཀྱི་དངོས་ཡོད་དང་མཐུན་པའི་བཀོད་པ་བྱེད་དགོས་པའི་སྐུལ་ཚིག་སྤྲད་པ་ལྟར། རིག་ནུས་ AI ཡིས་དཀའ་ངལ་འདི་དག་ཚགས་པོར་སེལ་ཐུབ་པ་བྱུང་སོང་།

💡རིག་ནུས་ AI ལ་བརྟེན་ནས་གྲུབ་འབྲས་བཟང་པོ་ལེན་པའི་སྤྱི་སྤྱོད་ལམ་སྟོན།

ཁྱེད་ཀྱིས་ཡང་བཅོས་མའི་རིག་ནུས་ (AI) ལ་བརྟེན་ནས་འདི་ལྟ་བུའི་ཁྱབ་བསྒྲགས་འདྲ་གཟུགས་མཛེས་པོ་རྣམས་ལས་སླ་པོར་བསྐྲུན་ཐུབ། ནོར་འཛོལ་ཉུང་བ་དང་ལམ་ཀྱག་ཀྱོག་ལ་བསྐོར་མི་དགོས་ན་གཤམ་གྱི་གནད་ཀ་འདི་དག་འདྲ་གཟུགས་དང་རི་མོ་སོགས་མ་བཟོས་སྔོན་སེམས་ལ་ངེས་དགོས།

✅ བྱ་དགོས་པའི་གནད་ཀ། (To Dos)

སྐུལ་ཚིག་ཚིག་འགྲེལ་གསལ་པོར་འབྲི་བ། ཁྱེད་ཀྱིས་འདྲ་རིས་ནང་གི་མི་སྣ་དང་། གནས་སྟངས། དུས་ཚོད། མདོག་གཤིས་ (color tone) སོགས་ཆ་ཚང་ཞིབ་ཚགས་པོས་འབྲི་དགོས།
སྒྲོམ་གཞི་གསལ་བཤད་བྱེད་པ། འདྲ་རིས་ཀྱི་སྒྲོམ་གཞི་ (Aspect Ratio) དཔེར་ན། 16:9 ཡང་ན་ 16:10 ལྟ་བུ་གསལ་བཤད་བྱས་ན་ལག་ལེན་བསྟར་སླ་བ་ཡོང་།
གནད་མཁོའི་ཡིག་ཆ་མཉམ་དུ་བཅུག་པ། དཔེར་ན། དཔེ་དེབ་ཀྱི་ཕྱི་ཤོག་གི་སྒྲིག་གཞི་ཆ་ཚང་ཡོད་པའི་པར་རིས་ (Spread Image) ལྟ་བུ་མཉམ་དུ་བཅུག་ན། རིག་ནུས་ AI ཡིས་དཔེ་དེབ་ཀྱི་རྣམ་པ་ངོ་མ་དེ་འདྲ་གཟུགས་ནང་བཅུག་ཐུབ།

❌བྱ་མི་རུང་བའི་གནད་ཀ། (Don’ts)

སྐུལ་ཚིག་གི་ཚིག་བསྐྱར་ཟློས་མི་བྱེད་པ། གནད་དོན་གཅིག་གི་སྐོར་ལ་ཚིག་འབྲུ་མང་པོས་བསྐྱར་ཟློས་བྱས་ན་རིག་ནུས་ AI ལ་གོ་བ་ལེན་པར་དཀའ་ངལ་ཡོང་སྲིད།
སྐུལ་ཚིག་གི་ཚིག་མི་གསལ་བ་མི་འབྲི་བ། དཔེར་ན། “ཡག་པོ་ཞིག་བཟོས་ཤོག” ཅེས་བྲིས་ན་གྲུབ་འབྲས་བཟང་པོ་མི་ཡོང་། དེའི་ཚབ་ཏུ་ “བོད་ཀྱི་ཆོས་གོས་ལེགས་པར་བཞེས་པའི་བླ་མ་ཞིག་གིས་འགྲེལ་བཤད་གནང་བཞིན་པ།” ཞེས་འབྲི་དགོས།

མཇུག་བསྡུའི་གཏམ།

མདོར་ན་བཅོས་མའི་རིག་ནུས་ (AI) ནི་དཔེ་དེབ་ཀྱི་རྩོམ་པ་པོ་དང་། དཔེ་སྐྲུན་ཁང་། བོད་ཡིག་བེད་སྤྱོད་པ་ཚོར་མེད་ཐབས་མེད་པའི་དུས་གསར་གྱི་ལག་ཆ་གསར་པ་ཞིག་ཏུ་འགྱུར་བཞིན་ཡོད། སུ་དང་སུ་ཡིན་ཡང་འདི་ལྟ་བུའི་འདྲ་རིས་མཛེས་པོ་རྣམས་བསྐྲུན་ཐུབ་ཀྱི་ཡོད་པས། ཁྱེད་ཀྱིས་ལག་རྩལ་འདི་མ་བརྟགས་པར་མ་བཞག་རོགས།

གལ་ཏེ་ཁྱེད་ཀྱིས་འདི་ལྟ་བུའི་གྲུབ་འབྲས་ཇི་ལྟར་བྱུང་མིན་གྱི་བརྒྱུད་རིམ་ཆ་ཚང་ལ་ལྟ་འདོད་ཚེ། འོག་གི་བརྙན་ཐུང་འོག་ཏུ་ཆ་ཚང་གཟིགས་རོགས།